POLOKWANE – Om liefdadigheidswerk te doen beteken om jou tyd, energie en hart aan ander te gee, sonder enige verwagting van vergoeding.

Een so ’n persoon is Erna Graham, ’n tuisblyma van Polokwane wat, wanneer sy nie werk nie, haar tyd vrywillig afstaan aan Living in Hope NPC.

Erna het in 2020 vir die eerste keer in aanraking gekom met die organisasie toe sy self aansoek gedoen het vir hulp.

“Ek het kos nodig gehad en het aansoek gedoen. Toe ek hoor die bestuur soek hulp, het ek besluit om in te spring en aan te bied om te help. Ek was immers beskikbaar en wou graag iets teruggee.”

Erna sê sy hou van mense en geniet dit om te help.

“Ek weet self hoe dit voel om niks kos in die huis te hê nie. Dis hoekom ek niemand oordeel wat by ons aanklop vir hulp nie.”

Die meeste van haar tyd by die organisasie bring sy in die kosstoor deur, waar sy skenkings uitsorteer en herverpak.

Soms help sy ook in die kombuis met kosmaak of op ander plekke waar ekstra hande nodig is.

“Die mees bevredigende deel is om mense gelukkig te sien as hulle kos ontvang, veral die kinders. Dit maak alles die moeite werd. Living in Hope se voortbestaan lê my na aan die hart.”

Soos met enige werk met die publiek, is daar uitdagings.

“Soms kry ons mense wat onder die invloed van drank is en kos wil kom haal. En partykeer gebeur dit dat mense die kos wat hulle kry net eenvoudig weggooi. Dit laat ’n bitter smaak in jou mond.”

Nog ’n uitdaging is die gebrek aan skenkings, veral in die feestyd.

“Droë produkte soos rys, meel en blikkieskos is skaars hierdie tyd van die jaar, en dis presies wat ons nodig het.”

Erna het intussen waardevolle lewenslesse geleer.

“’n Mens moet versigtig wees want nie almal wat hulp vra, is eerlik nie. Maar aan die ander kant kry jy mense wat met soveel dankbaarheid kom dat dit jou hart aanraak. Ek het al gehuil saam met iemand wat met opregte dankbaarheid ’n kospakkie ontvang het.”

Erna is bekend vir haar hartlike, opregte glimlag.

“Ek glo ’n glimlag kan baie beteken – ons weet nie waardeur iemand gaan nie. Soms is dit al wat ’n mens nodig het.” Sy glo welsynswerk is ongelooflik vervullend. “Jy gee terug aan jou gemeenskap. Jy help mense, maar jy groei self ook.”

Al is sy passievol oor haar gemeenskapswerk, dra Erna ook ’n persoonlike droom naby aan haar hart.

“Ek droom daarvan om Kaap toe te gaan om my kinders en kleinkinders te besoek. Ek spaar elke keer, maar dan kom daar iets tussen. Hopelik word hierdie jaar die droom ’n werklikheid.”

Sy moedig ander aan om ook betrokke te raak by welsynswerk.

“As jy tyd het, selfs net ’n uur of twee, kom help by Living in Hope. Enige inligting oor moontlike skenkers is ook baie welkom. Dis ’n manier om ’n verskil te maak in iemand anders se lewe.”