POLOKWANE – Slegs vyf dae voor Kersfees moes Frans Gouws (57) se familie finaal van hom afskeid neem.

Frans is enkele dae voor sy dood met Stevens-Johnson-sindroom gediagnoseer nadat hy ‘n ernstige allergiese reaksie op medikasie ontwikkel het. Sy vrou, Marion, verduidelik dat die sindroom ernstige infeksies kan veroorsaak wat tot sepsis kan lei.

“Hy het die dokter besoek nadat hy pynlike rooi sere oor sy liggaam en in sy keel ontwikkel het. Die dokter het hom met Stevens-Johnson-sindroom gediagnoseer en hy is die daaropvolgende Woensdag opgeneem. Die simptome is soortgelyk aan derdegraadse brandwonde en pasiënte word gewoonlik in ‘n brandeenheid behandel,” het sy gesê.

Volgens Marion het die sindroom Frans se vel en slymvliese aangetas, wat sy liggaam se vermoë om die infeksie te beveg, ernstig benadeel het. “Hy het reeds hartprobleme gehad wat met medikasie beheer is, maar die infeksie het sy tol geëis en hy het twee hartaanvalle gehad,” het sy bygevoeg.

Frans word deur sy familie as ‘n toegewyde familieman onthou. “Sy kinders en kleinkinders was sy hele wêreld en hy sou enigiets vir hulle doen,” sê Marion.

Hy het ook ‘n passie gehad om ander te help en was deur sy werk by Ooba betrokke by verskeie gemeenskapsprojekte, waaronder die insameling van skryfbehoeftes en hulp met die bou van huise vir minderbevoorregtes.

Hy sal onthou word vir sy groot hart, vriendelikheid, saggeaardheid en geduld. Volgens sy familie het hy altyd ander se belange bo sy eie gestel en was hy uitstekend met probleemoplossing.

Buiten sy liefde vir mense, het Frans ook ‘n groot liefde vir hamburgers gehad, iets wat sy familie altyd sal koester.

Kollegas by Ooba beskryf hom as ‘n mentor, ‘n lojale vriend en ‘n kundige konsultant met ‘n besonderse sin vir humor. “Frans se afsterwe laat beslis ‘n groot leemte,” het verskeie kollegas gesê.

Frans word oorleef deur sy vrou Marion, sy dogters Maryke en Simoné, Simoné se verloofde Dean Smit, drie kleinkinders, sy broers Johan en Steven, en sy suster Elmarie van Zyl. Sy gedenkdiens vind môre (Vrydag) om 10:00 by die Taberna Dei Moederkampus plaas.