POLOKWANE – Een van die jarelange tradisies by Hoër Tegniese Skool Tom Naudé is die inhuldiging van nuwe personeel en die gr. 8’s.

Dié nuwelinge is op 14 Januarie amptelik ingehuldig as Tommies, tydens die tradisionele swaardseremonie waar skoolhoof Vanessa Kachelhoffer elke nuweling tot ridder slaan. Hierna is elkeen ‘n volwaardige Tommie.

Voor hulle egter tot ridder geslaan kan word, lê hulle die Tommie-eed af. Hierdie seremonie verteenwoordig meer as net ‘n eenvoudige verwelkoming. Deur tot ridder geslaan te word, verbind die Tommies hulle tot die waardes van respek, lojaliteit, trots en dissipline. Hulle word deel van ‘n groter skoolfamilie, met ‘n verantwoordelikheid om hierdie waardes op die skoolterrein asook ander dele van hulle lewens te handhaaf.

Aan die einde van die leerders se gr. 12-jaar word hierdie tradisie weer herhaal en vorm dit ‘n sirkel wat voltooi is.

“By Tom Naudé doen ons meer as om op te voed. Ons bou karakter, identiteit en trots. Die swaardseremonie herinner ons daaraan dat jy nie alleen ‘n Tommie word deur by die skool ingeskryf word nie, meer eerder een deur waardes, tradisie en jou toewyding.”