POLOKWANE – Sommige noem dit ‘Hartjiedag’, ander weer ‘Harteliefiedag’.

Oral is daar ‘n oorvloed rooi en wit ballonne, sjokolade wat uitgeruil word en hier en daar ’n teddiebeer wat ‘n nuwe eienaar kry.

Die blom van die dag bly steeds die klassieke rooi roos.

Met Valentynsdag Saterdag is dié dag in skole reeds op Vrydag gevier, en leerders regoor die het stad hul gunsteling rooi, wit en pienk uitrustings aangetrek.

Hartjies was die tema van die dag en kaartjies met boodskappe van liefde en waardering is vrolik uitgedeel.

By die kleuters is Valentynsdag meestal ‘n kleurvolle geleentheid sonder veel begrip van die betekenis daaragter.

Wat hulle aantrek, word grootliks deur ouers besluit, en selfs die spesiale hartjiepousebroodjies maak nie altyd ‘n groot indruk nie – solank daar gespeel kan word, is hulle tevrede.

Onder die gr. 1 tot 3-leerders is daar heelwat geterg oor wie se kêrel of meisie wie is, al word daar skaars saam gespeel.

Baie verkies om eerder kaartjies of klein geskenkies vir hul ouers of onderwysers te maak en te gee.

In die laerskooljare raak Valentynsdag soms ‘n bietjie meer ingewikkeld.

Sommige leerders stel glad nie belang in romantiese gevoelens nie, terwyl ander stilweg ‘n oog op iemand het.

Geskenkies word skaam-skaam oorhandig of heimlik in ‘n skooltas gesit as ‘n verrassing.

Teen hoërskool word Valentynsdag meer openlik gevier.

Ballonne, blomme en sjokolade word met selfvertroue uitgedeel, en baie leerders kry die geleentheid om saans op die maat van liefdesmusiek te sokkie.

Of dit nou romantiese of platoniese liefde is, Valentynsdag bly vir elke leerder ‘n unieke en spesiale ervaring – ‘n dag waarop waardering, vriendskap en omgee sentraal staan.

Om al die foto’s van die Valentynsdagvieringe te sien, loer hier