POLOKWANE – Vir sommige mense is ‘n hond net ‘n troeteldier.

Vir ander is dit ‘n maat wat jou elke dag bly inwag. En vir sommige mense is ‘n hond iets veel meer: ‘n noodsaaklike deel van hul veiligheid, onafhanklikheid en lewenskwaliteit.

Dít is waar dienshonde inkom: honde wat spesiaal opgelei word om by hul eienaars se unieke behoeftes aan te pas.

Leané Venter (19) leef met nystagmus, ‘n toestand wat haar sig ernstig beïnvloed. Sy is afhanklik van haar gidshond, Huckleberry, wat haar help om veilig en selfstandig te beweeg.

“Ek sukkel ook met angs. Al is Huckleberry nie spesifiek daarvoor opgelei nie, gee sy teenwoordigheid my baie meer selfvertroue,” sê sy.

Huckleberry is Leané se eerste dienshond. Sy het hom uit ‘n groep van vier gekies.

“Hy is ‘n golden retriever, en toe ons mekaar ontmoet het, was daar sommer dadelik ‘n konneksie.”

Sy het Huckleberry by Smart Service Dog gekry, waar hulle saam opleiding ondergaan het om as ‘n span te werk.

“Dit was aanvanklik moeilik, want ek moes leer om hom te vertrou. Die opleiding het ons in alledaagse situasies geplaas, selfs in winkelsentrums.

“Teen daardie tyd het ons al goed saam gewerk. Hy gebruik byvoorbeeld altyd ‘n oprit en nooit trappe nie.”

Leané sê dit is nie altyd maklik nie, veral omdat baie mense nie bewus is van hoe dienshonde werk nie.

Sy is onlangs selfs toegang tot ‘n winkelsentrum en die Departement van Binnelandse sake geweier.

“Huckleberry het streng reëls.

“Hy eet net by my en mag nie kos by ander mense vat nie. Wanneer hy sy harnas dra, beteken dit hy is aan die werk, mense moenie aan hom raak of met hom praat nie.”

Sy erken egter dat sy soms sag word vir kinders en bejaardes en hulle toelaat om hom te streel.

Huckleberry se harnas is spesiaal vir hom ontwerp en hy word gereeld by ‘n hondesalon bederf.

“Hy slaap by my op die bed want ek glo dit versterk ons band. Ek studeer sielkunde aan die Noordwes-Universiteit se Potchefstroomkampus, en hy is net so tuis soos ek in die koshuis.”

Vir Leané is Huckleberry nie net ‘n hond nie, hy is haar oë, haar sekuriteit en haar konstante metgesel.