POLOKWANE – Bekende motor-entoesias en veld- en tydrenner Attie van der Merwe (74) laat beslis ‘n nalatenskap van passie en integriteit agter

Attie, ‘n naam sinoniem met Synchro Motors, is Sondag na ‘n lang siekbed oorlede.

Hy was bekend vir sy deursettingsvermoë en vasberadenheid om probleme op te los, en laat ‘n nalatenskap van passie vir motors en toewyding aan familie en die gemeenskap agter.

Sy familie moes van hom afskeid neem na ‘n lewe vol harde werk en liefde. Sy skoondogter, Wilma, sê hy was ‘n liefdevolle eggenoot vir sy vrou, Marie, en ‘n streng maar regverdige pa vir sy kinders.

“Sy familie was vir hom baie werd, en hy het dit geniet om ons almal gelukkig te sien.

“Sy besigheid, Synchro Motors, was nie net ‘n werkplek nie, maar ‘n nalatenskap vir sy seun en later sy kleinseun,” het sy vertel.

Wilma onthou hoe Attie, voor hy aan die einde van 2023 opgehou werk het, voertuie met passie en toewyding herstel het en sy kennis aan die volgende geslag oorgedra het.

Sy trotsste oomblik was om sy kleinseun, Heinrich, deel van die besigheidsfamilie te sien wees.

“Hy was ‘n man van integriteit wat bekend was vir sy eerlike en betroubare werk, asook sy bereidwilligheid om ‘n helpende hand uit te steek.

“Deur die jare het hy verskeie skole en organisasies ondersteun en lewens aangeraak,” sê sy.

Attie se familie onthou hom as iemand wat altyd sy beste gegee het om in enige omstandighede ‘n probleem op te los.

Niks was ooit vir hom te veel moeite nie.

As pa het hy altyd sy kinders se beste belange op die hart gedra, en as oupa was hy sag, trots en vol wysheid.

Hy het graag sy kennis met sy seuns, Hein en Wynand, en sy kleinseun, Heinrich, gedeel, en hulle geleer dat hulle met respek, eerlikheid en harde werk groot hoogtes kon bereik.

Hy was nie net ‘n toegewyde gesinsman nie, maar ook ‘n passievolle motorgeesdriftige.

“Hy het ‘n groot liefde vir motors gehad, en wanneer hy nie aan ‘n motor gewerk het nie, het hy aan motorwedrenne deelgeneem.

“Hy laat ‘n leemte wat nooit gevul kan word nie, maar sy waardes, wysheid en voorbeeld sal altyd voortleef in sy familie en almal wat hom geken het,” sluit Wilma af.

Attie word oorleef deur sy vrou Marie, seuns Hein en Wynand, en kleinkinders.

Sy begrafnis vind plaas op 6 Maart om 10:00 vanuit die Taberna Dei Moederkampus.