Mediese uitgawes hoop op vir gesin
’n Jong tiener se lewe verander drasties ná erge rugpyn, terwyl haar gesin sukkel met stygende mediese kostes en onseker behandeling.
POLOKWANE – Slegs drie jaar gelede was Jessica de Beer nog ‘n onskuldige tiener wat daarvan gehou het om tyd in die natuur deur te bring en lang ente saam met haar hond, Tasha, te gaan stap.
Tiener se lewe verander deur rugpyn
Vandag lyk haar toekoms minder rooskleurig en bring sy baie tyd rustig by die huis deur, nie daartoe in staat om te dans, fiets te ry of te oefen nie.
Jessica het ‘n paar jaar gelede begin kla oor pyn in haar lae rug.
Ná verskeie besoeke aan dokters in Pretoria is daar bevind dat sy ‘n risotomie moet ondergaan.
Dit is ‘n mediese prosedure waar sekere senuweewortels gesny of met ‘n laser behandel word om pynseine te blokkeer of te verminder.
Jessica se ma, Amelia, sê sy sit met haar hande in haar hare oor die toenemende uitgawes.
“My man, Pieter, moes in Mei 2023 ‘n operasie aan sy nek ondergaan nadat hy dit by die werk beseer het. Daarna moes hy gereeld teruggaan vir verdere operasies.”
Pieter se salaris het hoofsaaklik vir die gesin se maandelikse uitgawes gegaan, maar hulle het ook ‘n vragmotor gehad waarmee hulle ‘n inkomste kon verdien.
Finansiële druk neem toe vir gesin
Ongelukkig het die vragmotor later gebreek, en Pieter het uiteindelik sy werk op die plaas verloor omdat hy nie meer die werk kon doen nie.
“Jessica het reeds op vyfjarige ouderdom begin dans en aan verskeie nasionale kompetisies deelgeneem.
“Sy en haar tweelingsussie, Dané, het later na gimnastiek oorgeskakel, maar nadat dit te duur geword het, het hulle aanlynklasse by Maryka Botha gevolg,” sê Amelia.
Weens die pyn in haar rug moes Jessica egter ophou dans.
Vroeër vanjaar is sy vir skanderings na Pretoria, waar ‘n chirurg op 26 Februarie ná ‘n MRI-skandering probleme met haar C3-C6 werwels opgemerk het.
Hoop op behandeling en antwoorde
“Soos dinge nou staan, sit ons reeds met baie onbetaalde hospitaal- en doktersrekeninge wat die mediese fonds nie dek nie.
“Die mediese fonds het ook nie die risotomie wat op 13 Maart sou plaasvind, goedgekeur nie,” sê Amelia.
Die familie se plan is om Jessica na ‘n pediatriese spesialis te neem om die pad vorentoe te bespreek.
Vir meer inligting, kontak Amelia by butterflyinterior7@gmail.com.
