POLOKWANE – Ten spyte van die winterkoue het lede van die Bosveld Jagtersvereniging (BJV) Pietersburg onlangs in groot getalle saamgetrek vir ‘n gesellige dag wat op teikenskiet en skietvernuf gefokus het.

Die geleentheid het skuts die kans gebied om hul akkuraatheid te toets, vaardighede met mekaar te deel en voor te berei vir die komende jagseisoen.

Meer as 50 jaar se tradisie

Sakkie Labuschagne, voorsitter van BJV Pietersburg, het gesê die klub het ‘n trotse geskiedenis van meer as 50 jaar.

“Ons is die tweede oudste jagorganisasie in die land. Ons doel is om verantwoordelike vuurwapengebruik en skietkuns te bevorder,” het hy vertel.

’n Sport vir die hele gesin

Labuschagne het beklemtoon dat die sport vir die hele gesin is en nie net vir volwassenes nie.

“Ons moedig ook kinders aan om onder toesig deel te neem. Dit leer hulle dissipline, respek vir vuurwapens en ‘n liefde vir die buitelewe.”

Die pretdag vorm deel van die klub se gereelde jaarprogram. Elke twee maande word ‘n aktiwiteit aangebied om lede aktief en betrokke te hou.

Hy het bygevoeg dat deelname vir toegewyde sportskuts ook ‘n vereiste is.

“Om jou sportskutakkreditasie te behou, moet jy ‘n sekere aantal skietdae per jaar voltooi. Geleenthede soos hierdie help lede om aan daardie vereistes te voldoen,” het hy verduidelik.

Nuwe lede welkom

Labuschagne het verder gesê die klub is oop vir nuwe lede wat belangstel om skiet en jag as sport aan te pak.

“Ons gee nie om oor ras, kleur of geloof nie. Ons doen dit uit liefde vir skiet en vir die jag,” het hy gesê.