POLOKWANE – Die naam Peet Kruger (65) is vir talle jarelange inwoners van die stad bekend.

Oor die jare heen is hy verbind met Soetdorings Lodge en Buiteklub, motorfietsbyeenkomste en talle gesellige kuieraande.

Kruger is op 11 Junie aan ‘n hartaanval oorlede. Sy kinders onthou hom as ‘n sterk, beginselvaste man wat altyd sy familie eerste gestel het.

’n Sterk pa en beginselvaste man

Sy seun, Niekie Kruger, getuig hiervan.

“My pa was ‘n yster en het ons hard grootgemaak en voorberei vir die lewe. Hy was altyd daar wanneer ons hom nodig gehad het. Hy het my aan ‘n ou buffelbul, ‘n ‘daggaboy’, herinner. Hy het die trop gelei, beheer geneem en geweet waar die gras groen is. Hy het op sy eie geloop en mure om hom gebou, maar vir sy kinders was hy altyd daar.”

Volgens Niekie was sy pa ‘n man van sy woord.

“Hy het vasgestaan in sy waardes. Sy woord was sy eer, en as hy gesê het hy gaan iets doen, het hy dit gedoen. Hy het sy ‘battles’ met wysheid gekies en nie elke uitdaging gestormloop nie. Sy familie het altyd eerste gekom. Hy het ons geleer dat moeilike tye nie vir altyd aanhou nie en dat ons dinge beter moet agterlaat as wat ons dit gekry het. Hy het ons ook geleer om ons letsels met trots te dra.”

Geloof, herinneringe en vrede

Kruger se jongste dogter, Simone Crouse, sê elkeen van die kinders het ‘n unieke verhouding met hul pa gehad.

“Hy moes geweet het dat ek meer besorg was oor sy siel as oor die aardse dinge in die lewe. Hy het ‘Amazing Grace’ aan my opgedra, en ek weet hy is nou vry. Waar hy nou is, is daar nie meer seer nie. Toe ek van sy afsterwe hoor, het ek vir vrede gebid. My hart was swaar, maar my pa was heel, nuut en volmaak, vir ewig by Jesus. Ons weet hy het die afgelope jaar ‘n besonderse pad saam met Jesus gestap.”

Sy voeg by dat haar kinders steeds eienskappe van hul oupa weerspieël.

“Hulle dra sy aansteeklike lag, sy doelgerigtheid en sy nederige, liefdevolle houding saam.”

Lewe vol stories en nalatenskap

Kruger se oudste kind, Thelma Geijsendorpher, sê haar pa se groot, passievolle en kleurvolle lewe sal altyd onthou word.

“Daar bestaan soveel weergawes van jou as wat daar mense is wat jou ken. My pa het baie weergawes. Ek onthou hoe ons as kinders saam gespeel het, mekaar gejaag het, seevakansies geniet het, moerbeie geëet het en hoe ek op sy skouers kon sit. Ek het dikwels in die nag by hom gaan inkruip en my koue lyf teen sy warm maag gedruk. By hom het ek veilig gevoel.”

Sy vertel dat haar pa verskeie ondernemings bedryf het en sy kinders baie geleenthede gebied het.

“My pa het my toegelaat om te wees wie ek is, al was ek anders as hy. Hy was lief vir die bos en die natuur en het vir baie honde ‘n tuiste gegee. Mense het gesê hy was hardkoppig, maar ons was lief vir hom. Hy het nooit opgehou om sy drome na te jaag nie.”

Kruger word oorleef deur sy vyf kinders en vier kleinkinders.

Familie en vriende het op 27 Junie van hom afskeid geneem. Sy as is volgens sy wens deur sy familie in die see by Houtbaai gestrooi.