Osie’s vier einde van Kalanderfees met tentedorp
Tentedorp was die laaste item op die program in 'n bedrywige week vir die Osies met die dat hulle swemgala, sjokolade atletiek en Mnr. en Mej. Oosskool ook gehou is.
POLOKWANE – Na Oosskool se jaarlikse Tentedorp in Februarie vanjaar weens reën moes uitgestel word, was voorverlede Donderdag ‘n wolklose aand toe dié skool se senior leerders as deel van die jaarlikse Kalanderfees dié gewilde geleentheid kon bywoon.
Tentedorp was die laaste item op die program in ‘n bedrywige week vir die Osies met die dat hulle swemgala, sjokolade atletiek en Mnr. en Mej. Oosskool ook gehou is.
Soos in die verlede was daar talle aktiwiteite om die leerders mee besig te hou en het leerders ook bordspeletjies en ander speelgoed saamgebring.
Daar was heelwat eetgoed te koop en die leerders het ook hulle eie saamgebring.
Net toe die leerders dink die aand kan nie beter raak nie, daag Sorina ‘Die Flooze’ op en vermaak hulle met gunstelinge soos Tennis Tune, en Sout en Peper. Sy het ook saam met hulle, Tjomma Jy’s ‘n Champion, Sorina se nuutste liedjie gesing en dans.
Dié lied is ook deel van ‘n uitdaging, die Skole Tjomma Challenge wat tans tussen skole regoor die land gehou word.
Na Sorina se optrede was slaap beslis die laaste gedagte op die meeste Osies se agenda, en daar is tot vroegoggend nog gelag, gesels en gespeel.