POLOKWANE – Oom Fanie is dikwels die grootste aansporing vir nuwe ruiters wat Saterdag aan die SAWMGA-kompetisie gaan deelneem.

Dié ruiters is onderwysers van verskeie skole in die stad, asook Louis Trichardt en Tzaneen, wat vir die eerste keer aan dié kompetisie, wat by Winnfield Stables plaasvind, gaan deelneem.

Oom Fanie is bekend in die perdegemeenskap, en almal weet hy doen dinge op sy manier, byvoorbeeld om ‘n Porterhouse-biefstuk kry by ‘n vegan-restaurant, te bestel, ‘n kragmeting met Superman te hê en selfs met Chuck Norris vriende te maak na ‘n dag op die rug van ‘n perd in die bosveld.

Daar word vertel Oom Fanie se wekker is selfs te bang om hom wakker te maak en dat spoke koue rillings kry as hulle Oom Fanie se naam hoor.

Hierdie week, so net voor Saterdag se kompetisie het Oom Fanie begin om te sing en het hy sy eerste treffer, Limpopo Jou Lekker Ding, die lig laat sien.

Oom Fanie, met sy blou geruite hemp, kruisbande en grys baard is ‘n stoere ondersteuner van die SAWMGA-ruiters en wens elkeen voorspoed toe vir die naweek se kompetisie.