Eerstes vir dié Comrades-atlete van Polokwane
By Pietersburg Road Runners (PRR) is hierdie mylpale iets om te vier, nie net deur die atlete nie, maar ook deur ondersteuners.
POLOKWANE – Die Comrades Maraton wat Sondag gehou is, bring jaarliks unieke mylpale mee: ‘n eerste keer om die wedloop te voltooi, ‘n eerste keer om twee opeenvolgende wedlope klaar te maak, of dalk ‘n eerste goue medalje.
By Pietersburg Road Runners (PRR) is hierdie mylpale iets om te vier, nie net deur die atlete nie, maar ook deur ondersteuners.
Johan van der Merwe het sy 20ste Comrades suksesvol voltooi in ‘n tyd van 07:35:43, en sy seun JJ het kort daarna in 07:40:47 oor die eindstreep gehardloop in sy heel eerste Comrades.
Hierdie pa-en-seun-prestasie het baie harte geraak.
Lize-Marie Opperman het geskiedenis gemaak as die eerste vroulike PRR-atleet wat die Comrades voltooi het.
Sy het dit reggekry met ‘n indrukwekkende tyd van 08:54:30 en ‘n welverdiende Bill Rowan-medalje verower.
Die medalje is vernoem na Bill Rowan, wat in 1921 die eerste Comrades gewen het in ‘n tyd van 08:59.
Van der Merwe was ook die eerste PRR-atleet om vanjaar se wedloop te voltooi.
Al het slegs 20 van die 22 PRR-atlete die wedloop binne die gespesifiseerde tyd voltooi, is daar rede tot groot trots: al sewe van PRR se ‘novice’-atlete het hul heel eerste Comrades suksesvol voltooi.
