POLOKWANE – Aan die einde van November het Regan de Neijs (21) se wêreld handomkeer verander toe hy vir die eerste keer aan die Wêreld Liggaamsboukampioenskappe in Pattaya, Thailand, deelgeneem en met twee goue medaljes huis toe gekom het.

Regan, ’n B.Sc-student in Stellenbosch, het vroeër vanjaar aan liggaamsbou begin deelneem. “Ek het ‘n eerste plek in die ‘Junior Men’s Physique World Champion’-afdeling en in die ‘Junior Bodybuilder World Champion’-afdeling behaal, en ’n tweede plek in die denim model-afdeling,” vertel hy.

Dié prestasies het egter nie sonder opofferinge gekom nie.

“Liggaamsbou is net soveel geestelik as fisies. Jy moet gemotiveerd en toegewyd bly, hard oefen en reg eet. Dit beteken soms nee sê vir partytjies en jou hongerpyne ignoreer wanneer dit nie tyd is om te eet nie. Dit is selfs moeiliker om dit met studies te balanseer. Ek moes my liggaam tot sy volle kapasiteit druk – ek het in ’n stadium slegs 4% vet gehad.”

Oor sy eetplan sê hy dat hy suiker, vette en te veel sout vermy, maar na ’n groot kompetisie geniet hy soms ’n hamburger, pizza of ’n sjokolade.

“Vetterige kos vertraag vertering en te veel sout beïnvloed waterbeheer in die liggaam. Na ’n kompetisie slaap ek 10-12 ure en spandeer ’n paar dae in die sauna voordat ek weer begin oefen.”

Regan sê daar is ook baie wanpersepsies oor liggaamsbou.

“Mense wil onmiddellike resultate sien, raak ongeduldig en begin steroïdes gebruik. Maar jy het dit nie nodig om goed te lyk nie.”

Volgens hom is ’n goeie ondersteuningsnetwerk baie belangrik.

“My ouers, vriende en afrigter beteken baie vir my. Dit, saam met die wete dat ek na ’n doelwit toe werk en weet waarheen ek op pad is, hou my gemotiveerd. Ek was op skool al baie kompeterend en het geleer om druk te hanteer. Dit motiveer my om harder te werk en altyd beter te word.”

Lees meer oor Regan in vandeesweek se Polokwane Observer.