POLOKWANE – Nie vir een oomblik het liggaamsbouer Regan de Neijs (21) vroeër in sy lewe gedink dat ‘n besoek aan die ATKV Eiland hom eendag op ‘n wêreldverhoog sou plaas nie.

Regan en sy familie was met vakansie by die oord toe daar verskeie kompetisies gehou is, waaronder Mnr. en Mej. Spiere. Sy oom het hom aangespoor om deel te neem, en hy het sommer met die titel weggestap. “Ons moes rondom die swembad loop en in verskillende posisies poseer. Daardie wen het iets in my aangeskakel. Ek het besef ek geniet dit regtig,” vertel hy.

Ná hy foto’s op sosiale media gedeel het, het Jaco Jonker van Fitnation hom gekontak. “Hy het my potensiaal raakgesien en my as ‘n geborgde atleet ingestel. Hy is die rede hoekom ek is waar ek vandag is, en is steeds my afrigter.”

Regan sê sy sukses is te danke aan harde oefening, ‘n streng dieet en toewyding. Hy is tans ‘n derdejaar B.Sc-student in Stellenbosch, en die balans tussen sport en studie was nie maklik nie.

“Om vir die wêreldkompetisie voor te berei terwyl ek my graad voltooi het, was uitdagend. Daar is dae waarop jy geen energie meer oor het nie en in jouself begin twyfel, en met die leerwerk moet jy steeds tyd maak om te oefen. Op die sosiale front nooi mense jou ook nie altyd nie, want hulle weet jy gaan ‘n verskoning maak om nie te gaan nie.”

Die Wêreld Liggaamsboukampioenskappe, wat in November in Pattaya, Thailand gehou is, was sy eerste groot internasionale deelname. Regan het in drie afdelings meegeding en twee goue medaljes gewen.

“Ek het ‘n eerste plek in die ‘Junior Men’s Physique World Champion’-afdeling én in die ‘Junior Bodybuilder World Champion’-afdeling behaal, en ‘n tweede plek in denim model. Dit was ongelooflik om die swaar goue medalje en die Suid-Afrikaanse vlag om my nek te voel. Ek was trots om ‘n Suid-Afrikaner te wees.”

Hy sê die ervaring het bevestig dat al die opofferings die moeite werd was. Liggaamsbou is duur, van die voeding tot die voorbereiding, maar hy het geleer dat enigiets moontlik is as jy jou alles insit, het hy afgesluit.