POLOKWANE – Verlede jaar hierdie tyd het Juan Janse van Vuuren nog in die skoolbanke gesit en vir Hoërskool Pietersburg se eerste rugbyspan uitgedraf. Vanjaar is hy deel van die Rugby Travel Academy nadat keurders sy talent tydens die Cravenweek raakgesien het.

Juan, wie se vriende hom ‘Badskuim’ noem, speel al sedert hy kan onthou rugby saam met sy pa op die gras by die huis.

Sy eerste wedstryd was toe hy o/6 was en Oosskool verteenwoordig het.

“My droom was van jongs af om rugby op ‘n hoë vlak te speel en myself voortdurend te verbeter. Hoe ouer ek geword het, hoe groter het my liefde vir die sport geword,” sê hy.

‘n Plek in die presidentspan

Juan is onlangs in die Blou Bulle se o/20-presidentspan opgeneem wat op 19 Junie teen Zimbabwe se o/20-span op die Hannes Fourie-sportgronde, die tuiste van die Naka Bulle Rugbyklub, uitgedraf het.

“Dit was vir my ‘n ongelooflike groot eer om vir hierdie span gekies te word. Ek kan nie my gevoel beskryf nie.

“Op daardie oomblik, toe ek hoor ek is in die span, was al die harde werk en vele opofferings die moeite werd. Ek is dankbaar vir die geleentheid.”

Waar dit alles begin het

Badskuim onthou ook sy eerste wedstryd vir Hoërskool Pietersburg goed.

“Ek was in die o/14B-span en het teen HTS Tom Naudé uitgedraf. Ek speel gewoonlik flank, maar is ook gemaklik op slot. Ek geniet hierdie posisies aangesien ek daarvan hou om fisiek te wees, hard te werk en by die afbreekpunte ‘n verskil te maak.”

Geen proewe, net dopgehou

Volgens Juan was daar nie proewe vir die presidentspan nie. Spelers word oor ‘n tydperk van ‘n paar maande by verskillende toernooie dopgehou.

Sy grootste ondersteuners

Hy sê sy ouers was nog altyd sy grootste ondersteuners.

“Hulle het my deur dik en dun aangemoedig en baie opofferings gemaak om my drome te ondersteun.

“Ek is ook dankbaar vir elke afrigter wat deel van my ontwikkeling was, veral die afrigters by PHS, Corstiaan Vermaak en Piet Bester, asook Hendrik Malan in die jonger spanne en die Rugby Travel Academy-afrigters, Len Olivier en Nico Pretorius. Elkeen het ‘n belangrike bydrae gelewer tot my groei as speler en as mens.”

Wat Badskuim laat tik

Badskuim beskou sy werkstempo en sy vermoë om nooit op te hou werk vir sy span nie, as sy grootste sterkpunte op die veld.

“Ek probeer altyd ‘n positiewe bydrae lewer, of dit nou in aanval of verdediging is. Soos enige ander speler moes ek teleurstellings en beserings hanteer, maar dit het my geleer dat deursettingsvermoë en dissipline net so belangrik is as talent.”

Sy groot voorbeeld

Hy sê Springbok Pieter-Steph du Toit is sy grootste inspirasie.

“Ek kyk op na Pieter-Steph du Toit. Hy inspireer my om harder te werk. My doel is om aan te hou ontwikkel, my beste rugby te speel en geleenthede op ‘n professionele vlak aan te gryp.

“Ek wil uiteindelik op die hoogste moontlike vlak speel en my land trots maak. Ek sal graag wil terugkyk na ‘n loopbaan waarin ek elke geleentheid ten volle benut het.”