PHS se Ryan (15) skitter by PEL Limpopo-toernooi
Proteakolwer Quinton de Kock is Ryan se groot rolmodel – hy droom self van 'n loopbaan by die Proteas en in die IPL.
POLOKWANE – Proteakrieketspeler Quinton de Kock is nie net ‘n fantastiese kolwer volgens Ryan Evert nie, maar ook dié jongman se rolmodel.
Van skoolspan tot Verre Noord Predators
Ryan, wat deel is van Hoërskool Pietersburg se o/15A-krieketspan, het kort voor die skoolvakansie aan die Pretoria Elite League (PEL) Limpopo Elite Liga o/14- en o/15-T20 toernooi deelgeneem waar hy as veelsydige speler in die Verre Noord Predatorsspan, goed gevaar het.
Ryan presteer nie net voor die paaltjies nie, maar blink ook uit as paaltjiewagter en bouler.
Predators kroon hulself kampioene
Die Verre Noord Predators is as Plaatfinaalwenners gekroon.
Nuus wat hom van sy voete afgeslaan het
“Ek was op die o/14-NWU junior hokkiekamp in Potchefstroom toe ek hoor ek is vir die Verre Noord Predators gekies en ek was baie bly.
“Om aan die PEL Limpopotoernooi deel te neem het nie net vir my baie beteken nie, maar my ook gehelp om verder as krieketspeler te ontwikkel.”
Sweet in die nette
Ryan sê hy het hard gewerk om gereed te wees vir die Verre Noord Predatorsspan en het elke dag sy kolf- en boulwerk in die nette geoefen.
“Een van my beste oomblikke was toe ek met my heel eerste bal ‘n ses geslaan het. Die grootste uitdaging vir my was om konsentrasie te behou terwyl ek kolf. Om altyd gefokus op die veld te bly en net bal vir bal speel, is iets wat ek tydens die PEL Limpopotoernooi geleer het. Behalwe vir die krieket, speel ek ook hokkie en dus leer ek hard en oefen ek ook hard.”
Krieket by dag, hokkie by nag (en andersom)
Ryan oefen elke dag na hokkie, ook krieket by die huis. Verder probeer hy om een tot twee maal ‘n week in die nette by die skool ook te draai.
“Ek wil graag my kolfvernuf verbeter en werk hard om dit reg te kry. Ek droom daarvan om eendag vir die Proteas en die Indian Premier League (IPL) op die veld te stap.”
