29ste Cars in the Park ‘n gesinsdag
Saterdag sal pragtige blink motors buffer teen buffer staan by Genl. Piet Joubert-skool tydens vanjaar se Cars in the Park-uitstalling.
POLOKWANE – Saterdag sal pragtige blink motors buffer teen buffer staan by Genl. Piet Joubert-skool tydens vanjaar se Cars in the Park-uitstalling.
Hierdie jaarlikse geleentheid word vanjaar vir die 29ste keer aangebied en Dries de Lange, een van die organiseerders, vertel dat daar sowat 200 outydse motors vertoon sal word. “Ons het mense van Pretoria, Modimolle, Mookgopong, Makhado en Tzaneen wat hulle ou motors bring om uit te stal,” vertel hy.
Ook gaan daar stalletjies met klere en juweliersware wees. Die Gereformeerde Kerk Pietersburg sal sorg dat daar genoeg is om te eet en te drink.
‘n Verdere hoogtepunt van die dag is Eugene van Heerden en sy orkes wat besoe-kers met feestelike musiek sal vermaak.
Bekende motormaatskappye wat ook die dag teenwoordig gaan wees sluit Limpopo Toyota, BB Auto, Peugeot, Mahindra, Landrover en Jaguar, Honda en Suzuki, Volkswagen Comercial, Audi, Polowkane Multi Franchise, Tata, Kia en Hyundai in.
Die Suid-Afrikaanse Nasionale Bloeddiens (SANBD) gaan ook daar wees die dag en besoekers kan ‘n halfuur afstaan en bloed skenk vir ‘n goeie doel.
Die Harley Motorfietsklub se lede gaan ook die dag saam met die besoekers geniet.
Die bekende, en gewilde Facebook-blad, Pietersburg Sê jou Sê gaan ook Saterdag daar wees waar hulle ‘n insamelingspunt sal beman vir die Pietersburg Sê Jou Sê Samaritane.
Hierdie groep mense samel nie-bederfbare kos en klere in wat hulle dan aan behoeftige gesinne uitdeel. Die gesinne word eers besoek deur die komitee en gekeur.
Op Saterdag kan besoekers aan Cars in the Park nie-bederfbare kos bring en by die Pietersburg Sê Jou Sê-stalletjie afgee.
“Ons is daar om die mense te help, en maak staat op die gemeenskap om ook te help,” sê Johan Zeelie, voorsitter van die Samaritane se komitee.
