Veteraan- en sportmotors laat die oë rek

Die Bosveld Autoklub het hul 29ste Cars in the Park-uitstalling verlede Saterdag by Genl Piet Joubert Skool aangebied.

Behalwe vir die stalletjies gevul met met snuisterye, was daar ook heerlike kosse soos vetkoek, stokworsies en heerlike gebak te koop.

Gaste kon hul verlustig in ou motors soos Chevrolets, Studebakers en Porches.

Een uitstaller het selfs ‘n ou brandweerwa uitgestal wat hy aangekoop het en tans op sy plaas gebruik om brande te bestry.

Volgens Dries de Lange, een van die organiseerders, was daar uitstal-lers van Pretoria, Modimolle, Mookgophong, Makhado, Tzaneen en Modjadjiskloof.

Francois Swart het ‘n paar motors uitgestal, onder andere ‘n Studebaker Champion 1950-model.

“Ek het gelukkig nie vreeslik baie werk moes doen om hierdie motor op te bou nie. Ek het hom gekoop van ‘n ouerige oom,” het hy vertel.

Die Pietersburg sê Jou sê Samaritane het ook ‘n stalletjie beman.

Hierdie mense het van die geleentheid gebruik gemaak om nie-bederfbare kos, klere en ander benodighede in vir behoeftige gesinne in die gemeenskap in te samel.

“Sodra ons hoor van ‘n behoefte, stel ons eers ondersoek in en maak seker daar is werklik ‘n behoefte. Dan verskaf ons aan die mense soos ons goeddink,” het Johan Zeelie, voorsitter van die groep se komitee, verduidelik.

Johan het vertel hulle het heelwat kos en klere gekry Saterdag.

“Ons wil dankie sê aan elke individu wat kos en klere gebring het. Dit word opreg waardeer.”

Steve Anderson, een van die besoekers, vertel dat hy die dag baie geniet het.

“Die atmosfeer was gemaklik, die kos heerlik en die motors iets besonders.

“Ek kan nie wag vir volgende jaar se uitstalling nie.”