Touch of Class trek vol saal by NG Bendorpark
Die bekroonde duo, Ruhan du Toit en Deon van der Merwe, beter bekend as Touch of Class, se optrede by die NG Kerk Bendorpark het verlede Dinsdagaand vir ‘n vol saal gesorg en die gehoor se geesdriftige applous het daarop gedui dat ou treffers soos ‘Sweet Caroline’, ‘Have you ever seen the rain’ en ‘Sounds …
Die bekroonde duo, Ruhan du Toit en Deon van der Merwe, beter bekend as Touch of Class, se optrede by die NG Kerk Bendorpark het verlede Dinsdagaand vir ‘n vol saal gesorg en die gehoor se geesdriftige applous het daarop gedui dat ou treffers soos ‘Sweet Caroline’, ‘Have you ever seen the rain’ en ‘Sounds of silence’ nog steeds gewild is.
Van der Merwe se instrumentele vernuf en Du Toit se veelsydige vieroktaaf-stem is ‘n perfekte kombinasie en na dertien albums saam, vermaak hulle gehore landwyd met ’n verskeidenheid musiekgenres uit verskillende eras.
Die optrede is voorafgegaan deur ‘n aandmark waar besoekers aan pannekoek, kerrie-en-rys, worsrolle en heerlike poedings gesmul het terwyl hulle gesellig in ‘n tuinatmosfeer op die kerkterrein gekuier het.
Gemeenteleraar Wynand van Beek het ondersteuners van die geleentheid van harte bedank vir hul bydrae en gemeentelede se harde werk met die stalletjies beklemtoon.
Storie en foto’s: BARRY VILJOEN
>>barryv.observer@gmail.com
