POLOKWANE – Die huidige huurders van die Polokwane Gholfklub se kontrak verstryk eersdaags.

Die geriewe is voorheen vir ‘n tydperk van 30 jaar verhuur, maar die huurkontrak sal binnekort verstryk en ’n versoek vir die goedkeuring om die fasiliteit uit te verhuur is verlede Vrydag tydens die laaste raadsvergadering van die huidige raad se termyn ter tafel gelê.

Die Polokwane-raad sal ‘n hernubare kontrak van vier jaar en 11 maande goedkeur vir die volgende huurder, na ‘n mededingende bodproses gevolg is.

Die fasiliteit met sy klubhuis en kroeg bestaan uit ‘n onthaalarea, swembad, speelarea vir kinders, ablusiegeriewe, twee sale, The Pro Shop, uitspanplek met gholfkarparkeerarea vir 20 gholfkarre, agt personeelkamers met ablusiegeriewe, mans- en vrouekleedkamers met ablusiegeriewe, ‘n 18-putjie gholfbaan met oefengeriewe, ‘n oefenbof met drie oefensetperke, kiosk en ablusiegeriewe, werkswinkels met vier personeelkamers met ablusiegeriewe, asook gholfjoggie- en ablusiegeriewe.

Voornemende huurders sal ‘n huurbedrag van R21 000 per maand betaal, soos bepaal per evaluering deur ‘n professionele evalueerder.

Die verhuring van die klub sal nie die gemeenskap en ander instansies verhoed om die terrein te gebruik nie, maar is onderhewig aan gesamentlike goedkeuring deur die verhuurder en huurder.
Die raad het die huurooreenkoms goedgekeur met ‘n huurverhoging onderhewig aan die verbruikersprysindeks uitgesluit verbandkoste (VPIX).

Verandering en verbeterings by die eiendom sal die huurder se onkoste wees, onderhewig aan skriftelike goedkeuring deur die Polokwane Munisipaliteit.