BETHAL – Die voormalige hoof van beskermingsdienste en eienaar van Zhou’s op Bethal, mnr. Johan Swart (61), het op 26 April aan ’n hartaanval gesterf.
Hy het in 1983 as brandweerhoof op Bethal begin en is later tot hoof van beskermingsdienste bevorder waar hy die portefeulje van verkeer, lisensies en registrasie-owerheid bygekry het.
Mnr. en me. Annette Swart was in Maart vanjaar 40 jaar getroud en woon die afgelope 30 jaar op Bethal.
Mnr. Swart het in Augustus 2012 ’n agentskap vir Zhou’s op Bethal geopen en het hom in ‘n groot mate op die landboumark toegespits.
“Hy was ’n man met integriteit en iemand op wie jy kon staatmaak,” het me. Swart gesê.
“Sy hande het vir niks verkeerd gestaan nie en hy het vir alles ’n plan gehad.
“Hy het dit geniet om probleme op te los.”
Mnr. Swart se gedenkdiens was op 2 Mei in die N.G. Kerk Bethal-Oosgemeente.
“Hy was ’n wonderlike man vir my,” het me. Swart gesê.
Mnr. Swart laat sy vrou, twee seuns en vier kleinkinders agter.
Me. Swart het die gemeenskap vir hul liefde en ondersteuning bedank, asook hul kliënte vir hul volgehoue ondersteuning na die dood van mnr. Swart.
