ATKV Kosmosrand-tak gee terug aan gemeenskap
Ondersteun organisasie op Secunda en omgewing
SECUNDA – Die ATKV Kosmosrand-tak se nuutste projek, Trippe Trappe Tone, Kouse vir my Tone, het reeds afgeskop.
Hulle het op Donderdag, 7 Maart, kouse aan koshuisleerders van Laerskool Trichardt geskenk.
Me. Tracey van Wyk, voorsitter, het ook skryfbehoeftes wat liniale, potlode, penne en uitveërs insluit aan die koshuisvader, mnr. Henk Louw, oorhandig.
Hy gaan die skryfbehoeftes soos wat die leerders dit benodig, aan hulle uitdeel.
Me. Van Wyk se doelwit is om teen die winter twee pare kouse vir elke behoeftige kind te gee.
Dié tak samel ook tans komberse in wat vir die winter aan veiligheidshuise geskenk gaan word.
Mnr. Louw het namens die leerders, me. Van Wyk bedank vir die werk wat die tak in die omgewing, en veral vir Laerskool Trichardt, doen.
Vir meer inligting, of om by die ATKV Kosmosrand-tak betrokke te raak, skakel me. Van Wyk by 074 103 6381.
