Secunda-boorling maak skoonskip op motorfiets
Adrenalienverslaafde het groot drome vir volgende jaar.
Die adrenalienverslaafde Rudolf Pretorius, wat deesdae ’n professionele vrystyl motorfietsryer (FMX) is, het ’n hoogtepunt in sy loopbaan bereik toe hy op 25 November aan die grootste vrystyl motorfiets-vertoning, ‘King of the Whip’, deelgeneem het.
Pretorius het verlede jaar beide sy gewrigte gebreek terwyl hy vir dié geleentheid voorberei het. Hy het tans net 30% gebruik van een van sy gewrigte, maar hy pas aan om steeds te kan motorfiets ry. Hy het by Monte Casino in Johannesburg deelgeneem.
As vrystyl motorfietsryer het Pretorius al meer as een keer bene gebreek en beserings opgedoen. Pretorius het begin ry toe hy 17 was en hy het nog altyd van adrenalienbelaaide sportsoorte gehou.
Hy het vir lank op Secunda gemengde gevegskuns (MMA) gedoen en was ’n lid van Dominators Den en hy geniet ook watersportsoorte. Hy is deesdae meer in George waar hy sy onderneming uitbrei.
“Vandat ek hier is probeer ek branderplank ry en valskermsweef. Hier is net soveel meer geleenthede vir buitelugsportsoorte om te doen as op Secunda,” het Pretorius gesê.
Pretorius kom egter nog gereeld Secunda toe omdat sy kounstruksie- en telekommunikasie onderneming steeds ’n kantoor op Secunda het.
“Ek wou my leefstyl verander,” het Pretorius gesê oor sy besluit om na George te verhuis.
Deesdae neem Pretorius se loopbaan as motorfietsryer hom ook oor die land se grense en hy was verlede week in Zimbabwe om ’n vertoning te doen.
Hy het ook onlangs hande geneem met Fearless Energy, wat energiedrankies maak en ’n klerereeks, FRLSS.
Hy het in samewerking met dié handelsmerk ’n motorfietsbaan in George gebou.
Hy het ook onlangs ’n tydrenmotor gekoop en wil, wanneer hy meer tyd het, sy hand in dié sportsoort ook probeer.
“Ek het nog nie eers tyd gekry om in die tydrenmotor te ry nie,” het Pretorius vertel.
Hy wil graag volgende jaar aan die nasionale tydrenkompetisie in Suid-Afrika deelneem.
Hy het groot drome vir sy toekoms en sy doelwit is om, as hy borge kan kry, in Europa en Australië aan vrystyl motorfiets-vertonings gaan deelneem en om ’n bolemakiesie agterstevoor te doen.
Hy kan dié toertjie al in die skuimgat doen, maar nog nie op die grondbaan nie. Pretorius onderhandel tans met organiseerders in Indonesië om daar aan ’n vrystyl motorfiets-vertoning te gaan deelneem.
In sy vrye tyd speel hy graag gholf, stap, branderplank ry en hy beoefen al die afgelope vier jaar valskermsweef-sport. Hy bestee ook graag tyd saam met sy meisie, Stephnie Griffiths, en hul twee-jarige seuntjie, Blake.
ALSO READ: Staff from home-based care centre in eMbalenhle learn first aid
ALSO READ: Secunda Streekhof stuur stiefpa lewenslank tronk toe oor seksdade met dogters
