Luané Cornelissen (10) se mediese onkostes bly steeds hoog en die gesin benodig sowat R400 000 om Luané Duitsland toe te neem.
Luané is in Mei vanjaar gediagnoseer met Stargardt-siekte, ’n genetiese toestand wat ’n persoon se sig aantas.

Haar ouers wil, in ’n poging om te verhoed dat sy heeltemal blind word, haar na Duitsland neem, waar ’n oogspesialis ’n prosedure op haar sal uitvoer. Die prosedure sal haar ’n kans gee om die agteruitgang van haar sig te vertraag.

“Sy sal dan ’n 50/50 kans hê om weer te kan sien,” het haar ma, Uanita Cornelissen, gesê.

Luané het vroeër vanjaar ’n nuwe bril, asook ’n leser gekry wat sy by die skool gebruik om die woorde makliker te kan sien.

Haar ma wil nou vir haar ’n skootrekenaar met ’n spesiale digitale leser koop wat woorde vanaf haar boeke na oudio kan omskep, sodat sy dan daarna kan luister, maar dié toestel kos sowat R50 000.

LEES OOK: Parkrun in Standerton pulls 81 participants

Luané maak nou gebruik van ’n konsessie by die skool, waartydens iemand haar vraestelle en werk vir haar lees en die antwoorde skryf.

Sy is positief en hoewel Luané nie meer netbal kan speel nie weens haar sig, beoefen sy nou akrobatiese dans. Sy gaan op 28 November deelneem aan ’n konsert in akrobatiese dans. Sy is die hoofdanser van haar groep.

’n Comrades-atleet wat jaarliks vir ’n goeie doel aan die Comrades-marathon deelneem en geld insamel vir kinders wat hulp nodig het, hardloop volgende jaar vir Luané.

Haar gesin het hom, asook almal wat vir Luané boodskappe van bemoediging gestuur en reeds ’n bydrae gemaak het, bedank. As jy Luané wil ondersteun, besoek haar BackaBuddy-profiel by “Luané Stargardt’s”.

LEES OOK: CAER promotes fire and life safety awareness to young patients in Trichardt