Laerskool Kalie de Haas se Moe Poe Dag het vir groot pret, lekker potjiekos, bekende gesigte en natuurlik, groot pryse gesorg. Dié dag is gehou om die skool se koffers te versterk. ’n Perd, in plaas van ’n koei is gebruik om die wen-blok te “merk”.

Die eerte mis het op Louis Bester se stukkie aarde op die skool se rugbyveld geval, wat vir hom ’n stewige prys van R30 000 besorg het.

Die Flavour Queens het die tweede prys van R5 000 gewen, Peet Blignaut se derde plek het vir hom R2 500 in die sak geplaas, Angelica Louw het R1 500 gewen en Devin de Villiers R1 000.

Groot kompetisie het onder die potjiekosspanne geheers terwyl hulle gekook het om die guns van die beoordelaars te wen.

Karen Els, die wenner van Kokkedoor se 2023 Vuur en Vlam-seisoen en ook ’n top 10 finalis van die MasterChef SA werklikheidsprogram, was een van die beoordelaars.

Die “Voortrekkers” se pot het hier die kroon gevat.

Incredible Mommies was die naaswenners en Wyk 10 Wineklub het die derde plek ingepalm.