Bethal-vroue leer meer oor Duitse kos en tradisies
Tradisionele Duitse geregte, interessante Kersgebruike en eeue oue tradisies was van die onderwerpe wat tydens die Bethal-tak se vergadering bespreek is.
Die VLU Bethal-tak se lede het op 20 Oktober ’n interessante en leersame vergadering gehou waartydens Jenny van Rheede van Oudshoorn hulle meer oor Duitse kos, gebruike en tradisies vertel het.
Jenny het verduidelik hoe verskeie tradisionele Duitse geregte, waaronder potwors, gemaak word. Die potwors word daarna gebraai, soortgelyk aan spek wat vir ontbyt gebraai word.
Sy het ook vertel dat Hochzeitsuppe (bruilofsop) saam met bruin tuisgemaakte brood as voorgereg by Duitse bruilofsonthale voorgesit word.
Duitsers is lief vir kool, en die meeste mense is bekend met Sauerkraut (suurkool). Die suurkool word verhit en vars appel word daarby gerasper. Rooikool word as ’n slaai geëet of kan soos gewone kool gaargemaak word.
Jenny het ook Butterkuchen saamgebring. Dit is ’n soet brood wat met suurdeeg gebak word. In Duitsland staan dit as begrafnisbrood bekend, maar in Suid-Afrika word dit enige tyd geniet.
ALSO READ: Police shut down three non-compliant tuck-shops in Kinross
Sy het verder die Duitse Kersfeestradisies verduidelik. Volgens dié tradisie word een kers aangesteek op elk van die vier Sondae wat Kersfees voorafgaan. ’n Adventkrans word van immergroen takke gemaak, met vier kerse daarin.
Die Kersboom word eers op 24 Desember opgerig. In die kerk word daar gewoonlik ’n kinderdiens gehou waartydens die kinders met brandende kersies instap.
Daarna sing die gemeente saam die bekende Kersliedere. Duitse babas word so gou moontlik ná geboorte gedoop. Die ouers en peetouers staan by die doopvont wanneer die baba gedoop word.
In vroeër jare is moeders nie toegelaat om die kerk tydens hul baba se doop by te woon nie, aangesien hulle destyds as onrein beskou is.
Tydens reënweer bak Duitsers graag aartappelpannekoekies, wat saam met ingelegde perskes of appelmoes geëet word. Belangstellendes kan Lynette Posthumus by 072 203 6230 kontak om meer te hoor oor wat die tak volgende jaar beplan.
ALSO READ: Lekwa confirms Ext 8 pump station is operating below capacity
