SECUNDA – Dina Prinsloo het Mpumalanga-kleure in landloop gekry en het op 7 Junie aan die Internasionale Landloopkampioenskappe in Pretoria deelgeneem waar sy haar provinsie verteenwoordig het.
Sy het vyfde in haar afdeling geëindig.
Prinsloo het op Ermelo grootgeword en in 2002 na Secunda verhuis.
Sy is met Johann Prinsloo getroud en het in die aptekerswese gewerk totdat sy haar loopbaan vir haar gesin verruil het.
Die landloopgogga het haar gebyt toe sy in April verlede jaar op ’n trapmeul begin hardloop het en later by die Sasol Marathonklub aangesluit het.
Haar skoonpa, mnr. Tinus Prinsloo, is ook ’n atleet en het saam met haar op die pad begin hardloop om haar te help om voor te berei om aan wedlope te begin deelneem.
Prinsloo het haar skoonpa as haar afrigter aanvaar en sy slagspreuk is: “Fly now, pay later.”
Sy benader elke wedloop volgens haar skoonpa se slagspreuk en was al die wenner in haar ouderdomsgroep van verskeie padwedlope.
Prinsloo het haar familie vir hul ondersteuning bedank.
