Erries gekroon as Mpumalanga-kampioene by gholf-uitspele

Ermelo Hoërskool se B- en C-gholfspanne het Maandag, 13 Augustus aan die Mpumalanga-uitdunrondes deelgeneem wat by Walker Park Gholklub op Evander plaasgevind het.

Die Erries se B-span het uitmuntende gholf gespeel en ’n totaal van 106 punte bymekaar gemaak, twee punte meer as hul naaste teenstanders, en is as die Mpumalanga-kampioene gekroon.

Die C-span het hul voorbeeld gevolg en hul kaarte vir ’n totaal van 110 punte geteken, drie punte meer as dié van die naaswenners is ook gekroon as Mpumalanga-kampioene.

As die enigste skool in die Gert Sibande-streek wat meer as een span in die Mpumalanga-eindstryd gehad het, is die Erries ook nou die enigste skool in Mpumalanga wat meer as een Mpumalanga-span het.

Die Errie-spelers en -afrigters het die skool en gemeenskap vir hul ondersteuning deur die loop van dié geskiedkundige seisoen bedank.