’n Potjiekoskompetisie het weer ná 11 jaar by Ons Herberg plaasgevind.
Daar was drie potjies aan die kook en die aroma van geure het op Vrydag, 25 Februarie, in die lug gehang.
Danie Kruger en Elias Maseko is vanjaar se wenners en voormalige wenners, Lourens du Plessis en ds. Pieter van Wyk, het die tweede prys ingeplam.
Die eerste kompetisie het in 2004 plaasgevind en die trofee is destyds deur ouderling Lou Smit van die Gereformmerde Kerk in Bronkhorstspruit geskenk.
Die kompetisie was tot in 2010 ’n jaarlikse instelling.
Om een of ander rede is die kompetisie nooit weer gehou nie totdat dit nou weer aangebied is.
“Hier moet Gerda se naam pertinent genoem word omdat sy ’n groot aandeel gehad het in die herlewing van die geleentheid,” het Lourens du Plessis laat hoor.
Niemand het meer geweet van die trofee nie en die trofee was in besit van die Gereformmerde Kerk wat die laaste kompetisie in 2010 gewen het.
“Ons het die trofee se bestaan onder die organiseerders se aandag gebring en dit ook weer terug gegee. Ons is verseker dat dit weer ’n jaarlikse instelling sal wees,” het Du Plessis afgesluit.
“Daar was soveel mense wat die dag moontlik gemaak het. JVR security vir die borggeld, Varia Glas se kontant bydrae, B H S Grassnyerdienste/Power Products, Pick & Pay se Wikus vir die groente vir die beoordelaar, Speeks motors en Hi-Q se bydrae, sowel as Reinetten Prinsloo en George Prinsloo vir hulle beoordeling vir die dag.
“
Ons Herberg waardeer dit opreg,” het organiseerder Gerda van Rooyen laat hoor.
