Mens is nooit te jonk om die belangrikheid van omgee en hoop te leer nie, en dit is presies wat die kleuters van Carpe Diem Kleuterskool gedoen het met hul Bottels van Hoop-projek.
Annelize Floor, die hoof van Carpe Diem, het gesê, “Dit was die perfekte geleentheid om die kleuters te leer hoe belangrik dit is om vir ander mense om te gee. Ons het vir hul elkeen ‘n leë koffiebottel gegee en hulle het dit gevul met ‘n verskeidenheid gedroogde sopgroente en rys, wat hulle dan vir iemand in nood kon gee.”
Sy het bygevoeg dat dit nodig is om in onseker tye soos hierdie, die omstandighede vir die kinders in perspektief te plaas, en het gesê, “Kinders hoor gesprekke van hul ouers, en radio- en televisienuus, maar verstaan nie altyd alles nie. Kinders kan op ‘n jong ouderdom al leer om vir ander mense om te gee en uit te reik.”
Die inhoud van die bottels kan by twee liter water gevoeg word, en nadat dit gekook is, is dit ‘n heerlike en voedsame ete vir ‘n hele gesin.
“Die bottels is by die skool gevul en elke maatjie het trots sy bottel huis toe geneem en met hul ouers se hulp vir iemand gegee wat daarby sou baat,” Annelize het afgesluit.
