Ringbal weer volstoom aan die gang
'Ons het drie rondtes wedstryde gespeel, met verskeie water- en verfspeletjies tussenin.'
Die Warriors Ringbal Klub is weer volstoom aan die gang en het dit onlangs met ‘n opwindende Warriors Ringbal Pretdag gevier.
Alle Wes-Randse klublede sowel as hul vriende en familie is genooi om op Saterdag, 12 Februarie in die dag se joligheid te deel. Volgens klubvoorsitter, Bertus Botha wou hulle graag die sport bevorder, en voormalige en nuwe lede lok.
“Weens Covid die afgelope paar jaar het ons sport ‘n redelike knou weg as gevolg van regulasies en afwesigheid van lede. Daarom het ons bestuur so ‘n dag gereël – om mense te herinner waaroor dit gaan,” het hy vertel.
“Ons het drie rondtes wedstryde gespeel, met verskeie water- en verfspeletjies tussenin. Ons het selfs ‘n prettige kleurpoeiergeveg gehad. Sodra die son die spelers ‘n bietjie te warm begin bak het, het hulle gou weer afgekoel met ‘n waterballonspeletjie of twee. Ons vertrou dat almal die dag saam met ons geniet het.”
Bertus hoop om dié pretdag ‘n hoogtepunt op hul kalender te maak.
“Ons wil graag weer ringbal aan die gang kry, en ons glo dat Saterdag se aktiwiteite by al die gaste aanklank gevind het. Hiermee wil ons ook graag almal bedank wat deel gehad het aan die sukses van die dag. Ons sien daarna uit om weer volgende jaar so te maak,” het Bertus ten slotte vertel.
