Of dit nou fiksie, niefiksie, avontuur of ‘n roman is, daar is niks so bevrydend soos om verlore te raak in ‘n ander wêreld nie.
Gedurende die afgelope paar weke het talle laerskoolleerders ander wêrelde verken sonder om eers hul klaskamers te verlaat. Ter viering van Wêreldboekedag wat jaarliks op 23 April plaasvind, kon leerders hul verbeelding bladsy vir bladsy vlerke gee.
Op Vrydag, 22 April het Laerskool Florida die dag op ‘n gepaste wyse gevier toe elke Florrie hul eie, unieke boekmerk kon maak. Met ‘n paar helderkleurpenne, kleurvolle vere, pypskoonmakers, toutjies, plakkers, versierings en natuurlik ‘n ryk verbeelding is ‘n stukkie papier sommer gou in ‘n spesiale hulpmiddel omgetower.
Net so was die leerders by Laerskool Horison gretig om Wêreldboekdag te vier deur hul eie boekmerke te maak en ‘n stuk uit hul gunsteling boek voor te lees. Elke Horie het die taak met groot trots en kreatiwiteit aangepak en het terselfde tyd die belangrikheid van lees besef.
Vrydag, 29 April was ‘n opwindende dag vir die Laerskool Roodekrans-leerders toe hulle soos hul gunstelingstorieboekkarakter kon aantrek. Die skoolgange was sommer vroeg-vroeg al gevul met passievolle prinsesse, jagters, towenaars en skurke, om net ‘n paar te noem. Nodeloos om te sê, die leerders het hulself behoorlik in hul karakters ingeleef.
By Laerskool Dr Havinga is die dag met groot entoesiasme aangepak want Havies wat lees, word as ‘superheroes’ beskou. Op Vrydag, 6 Mei kon elke leerder dus volgens sy of haar gunstelingheld aantrek. Elke ‘superhero’ kon boonop ‘n paar bladsye uit hul gunstelingboek lees.
Lees is nie net belangrik omdat dit leerders se kreatiwiteit en verbeelding ontwikkel nie, maar ook omdat dit ‘n onafhanklikheidsin ontwikkel. Skole het dus die geleentheid aangegryp om ‘n leeskultuur aan te moedig.
Die bekende gesegde lui mos dat ‘n kind wat lees, ‘n volwassene word wat dink.
