Tannie Louisa Labuschagne het Maandag, 24 November haar 99ste verjaardag gevier, terwyl haar familie die Sondag saamgekom het vir ’n spesiale partytjie.

Gebore op Lady Grey, het Louisa op ’n jong ouderdom saam met haar familie na Potchefstroom verhuis, waar sy haar skoolopleiding voltooi het.

“In daardie jare was daar maar weinig werk op die platteland beskikbaar,” sê sy. “Dus het ek op 19 sak en pak Johannesburg toe verhuis. My droom was om verpleegkunde te studeer.”

Haar ouers was glad nie gelukkig met die skuif nie en het Johannesburg destyds as Sodom en Gomorra beskryf.

“My pa het uiteindelik toegegee aangesien daar nie regtig enige ander opsies was nie. In Johannesburg aangekom het ek ’n werk in ’n klerefabriek gekry en ’n blyplek onderhou.”

Sy onthou hoe sy eendag deur ’n vriendin aan ’n man voorgestel is.

“Hy wou met alle mag my beter leer ken, maar ek wou eers niks weet nie. Hy het uitgehou en aanhou probeer, en ons is uiteindelik getroud.”

Die paartjie is met ’n dogter geseën, maar minder as drie jaar ná hul troue is Louisa se man skielik oorlede.

“Dit was ’n massiewe skok,” sê sy. “Ek was alleen met ’n klein kind. Ek moes noodgedwonge my kind na my ouers stuur en het elke tweede naweek vir haar gaan kuier.”

Louisa het haar droom om verpleegkunde te studeer uiteindelik verwesenlik en later haar tweede man ontmoet, saam met wie sy twee seuns, Jan en Johan, gehad het. Hy is in 1988 oorlede.

“Vandag woon ek in Wilropark in ’n woonstel op my seun se erf en ek is baie gelukkig,” sê sy. “Ek doen steeds alles vir myself, alhoewel die gelopery nie altyd meer so maklik gaan nie.”

Om haar dae te vul, hou Louisa haar besig met haar gunsteling stokperdjie: legkaarte bou.

“Sy en my broer is albei lief daarvoor,” sê Louisa se dogter, Marie Grobler.

“Haar verjaardagpartytjie was ’n groot geleentheid vir die familie. Dit was baie spesiaal om al vyf generasies onder een dak te hê ter viering van my ma se spesiale dag.”