Andries en Hilda Maartins se hoop op ’n rustige Oujaarsaand by hul huis in Jan van Rooyenstraat is verydel deur die aanhoudende gedreun van vuurwerke wat hul buurt, soos baie ander in die Roodepoort-omgewing, geruk het.

“Dit het geklink asof ons in ’n oorlogsone was,” sê Andries, wat byvoeg dat hul twee honde, Scruffy en Woesie, erg deur die geraas getraumatiseer is. Volgens hom het hy die grootste deel van die nag na die ontstelde honde omgesien.

“Ons honde is baie sensitief vir dié tipe geraas en ek het besluit om seker te maak dat hulle veilig is.”

Die volgende oggend het die Maartins-egpaar egter ’n veel meer onrusbarende ontdekking gemaak.

“Toe ons op Nuwejaarsoggend in die studeerkamer instap, besef ons dadelik iets is nie pluis nie,” sê Andries. “Ons het die vensters toegemaak om die geraas buite te hou. Daarom het die beweging van die blinders, soos dit deur die wind gewaai het, my aandag dadelik getrek.

“By nadere ondersoek ontdek ek ’n gat in die venster, skade aan een van die blinders, sowel as ’n koeëlpunt wat in die vensterbank lê.”

Andries het die polisie se noodnommer gebel om die voorval aan te meld, maar niemand het opgedaag nie.

“Hulle sou iemand stuur om die koeëlpunt te kom haal, maar ons het nie weer van hulle gehoor nie. Ek het intussen ons plaaslike polisiesektorbestuurder se besonderhede bekom en die saak by Roodepoort-polisie aangemeld.

“Dis net ’n geluk dat niemand in die studeerkamer was toe die koeël getref het nie,” voeg Hilda by.

Roodepoort-polisie se luitenant-kolonel Sonja Engelbrecht het bevestig dat die saak by die Roodepoort-polisie hangende is.

“Wanneer sulke sake aangemeld word, identifiseer die polisie met behulp van ballistiese toetse die geregistreerde eienaar van die vuurwapen.

“Die eienaar van die vuurwapen sal dan van die onwettige afvuur van ’n vuurwapen in ’n munisipale gebied, die nalatige hantering van ’n vuurwapen, en saakbeskadiging aangekla word.

“Indien iemand raakgeskiet of doodgeskiet is, kom ’n klag van poging tot moord of moord by.

“Die vuurwapen word dadelik gekonfiskeer en ’n Seksie 102-ondersoek word geloods om die geskiktheid van die persoon om ’n vuurwapen te besit, te bepaal.

“Indien die persoon ongeskik bevind word, kan hy of sy kies om die wapen wettig te verkoop, of dit aan die polisie oor te gee.”