Groot skenking vir Havies in nood

Die Noordelike Mossies, tesame met People of South Africa, Manna met Hulp, en die Suid-Afrikaanse Infanterievereniging, het op 16 April kragte saamgespan om aan behoeftige leerders by Laerskool Dr Havinga hulp te verleen en hoop te verkondig.

Dit is gedoen ter viering van die skool se 71ste bestaansjaar.

Volgens Mossies stigter Isabel Coetzee, is Laerskool Dr Havinga gekies om hulde te bring aan ‘n skool wat vir haar persoonlik help vorm het.

“In 1977, op sewejarige ouderdom het ons na Witpoortjie verhuis,” vertel Isabel. “Ek het uit ‘n klooster gekom waar ons net Engels gepraat het, en daar was in daardie tyd nie Engelse skole in die area nie.

“Die destydse hoof, mnr Botha, was die enigste plaaslike skoolhoof wat kans gesien het om my by die skool te aanvaar. Hy het my met ope arms verwelkom en my onder sy vlerk geneem.

“Ek is geboelie omdat ek ‘n goeie kop langer as my klasmaats was en omdat ek snaaks Afrikaans gepraat het. Mnr Botha het my beskerm, ‘n persoonlike belangstelling in my skoolopvoeding geneem, en letterlik my lig aangesteek,” vertel Isabel met verwysing na Laerskool Dr Havinga se leuse, LIG.

“Ek is ten minste een keer per week na mnr Botha se kantoor geroep sodat hy met my kon gesels om te hoor hoe dit met my, en met my opvoeding gaan. Hy wou seker maak dat my lig nog brand.

“As dit nie vir Laerskool Dr Havinga en mnr Botha was nie, sou my lewe heel waarskynlik aansienlik anders uitgedraai het.

“Hierdie skool het my lig vir my moedertaal, vir sport en akademie, en vir die lewe aangesteek.”

Die saalopening is op die dag deur dr Stephan Maasdorp, nasionale vise-voorsitter van die Suid-Afrikaanse Infanterievereniging behartig, waarna 71 emmers, wat elk nie-bederfbare kruideniersware – genoeg vir ‘n gesin van vier vir sowat ‘n week – aan die skool oorgehanding is.

Die organisasies het ook 50 pare skoolskoene wat van herwinde materiaal vervaardig is, aan die skool oorhanding.