Laerskool Helderkruin se sportveld het op Vrydag, 16 Januarie, letterlik geborrel van energie toe die skool sy jaarlikse interhuis atletiekbyeenkoms (Op die Kruin – Interhuis 2026) aangebied het.

Van die vroeë oggendure af was dit duidelik dat hierdie nie net ’n atletiekbyeenkoms sou wees nie, maar ’n ware viering van Kruiner-trots, spanwerk en gemeenskap. Die vier huise se Koedoes het die veld laat leef in hul trotse kleure, met atlete wat alles gegee het – van vinnige naellope tot indrukwekkende gooie en spronge.

Die dag is deur uitstekende sportmanskap, deursettingsvermoë en entoesiasme gekenmerk. Leerders het mekaar aangemoedig, ouers het die pawiljoene gevul en onderwysers het hul ondersteuning met groot gees getoon.

Een van die hoogtepunte van die dag was beslis die onderwysers se wedloop, wat groot vermaak verskaf het. Juffrou Leandri Quinn en Mnr Jason van Wyngaardt is as die dag se ‘spoedvarke’ die wenstreep eerste bereik het.

Aan die einde van ’n opwindende dag is die Wit Koedoes as die algehele wenners gekroon – nie net van die atletiek nie, maar ook van die geesbeker, ’n bewys van hul eenheid, entoesiasme en volgehoue ondersteuning van hul spanmaats.

Spesiale erkenning word gegee aan Jonmenae Hendrikse, wat as Victrix Lodorum (Beste Senior Dogtersatleet) aangewys is, en Aiden Lamont, wat die titel van Victor Lodorum (Beste Senior Seunsatleet) ontvang het. Albei atlete het met hul prestasies en toewyding werklik uitgeblink.

“Op die Kruin – Interhuis 2026 het weereens bevestig waarvoor Laerskool Helderkruin staan: ’n skool waar talent ontwikkel word, karakter gevorm word en waar gemeenskap saambou aan iets groter,” sê die skool se skakelbeampte Christelle Hesselman.