Laerskool Dr Havinga se atlete het op Vrydag, 23 Januarie tydens hul atletiekbyeenkoms teen Laerskool Horison jag gemaak op die rekordboeke.

“Ons atlete het in ware Havie tradisie alles uitgehaal en uitstekende resultate behaal,” sê Havies skakelbeampte Lizelle Kies.

Ricardo Louwings het in die seuns o13 kategorie die 1 500m stapitem gemaklik in rekordtyd gewen.

Chinedu Chukwuemeka het is beide die 60m en 80m naellope in die o9- katergorie uitgeblink en sommer ook nuwe rekords in beide items opgestel.

Clayton Brits het nie op hom laat wag nie en die staande rekord in die o10 seuns 80m neallope laat spat.

Thato Pitt het in beide die 80m en die 100m naellope-item vir o11 seuns rekords van sy eie opgestel.

Die Havies se meisies het hulle nie deur die uitstekende uitslae van die seuns laat onder kry nie en spog ook met verskeie nuwe rekords.

Kamogelo Lethuba het in die o8 dogterskategorie rekords laat spat in beide die 60m en 80m naellope.

Juané Havinga het in rekord tyd met die 150m hekkies vir o12 dogters afgereken.

Maar dit was net die begin.

Jordan-Lee Africa het in die 75m hekkies-item vir o13 dogters ook ‘n rekord aangeteken.

Kayleigh Page het uitegblink met haar rekordvertoning in die dogters o11 verspring, en ook rekords laat spat in die 80m en 100m naellope.

Li-Anke Els het in die o10-kategorie rekord opgestel in beide die 80m en 100m items, en Anika Tsimenzi het die 1 200m vir dogters o11 in rekordtyd kafgedraf.