SUID-Natal Primêr bedank graag die 302 ouers wat die oueraand bygewoon het – Met sulke belangstelling, kan dit net goeie resultate lewer. Voornemende gr R ouers word herinner aan die opedag wat op 12 Augustus in die skoolsaal plaasvind en 2015 se gr R leerlinge sal dan ingeskryf word. Ouers kan gerus die skool kontak vir verdere besonderhede.
‘n Insiggewende atletiekafrigtingskursus is verlede Saterdag in Durban deur ASA aangebied en ‘n groep van 20 personeellede het dit bygewoon. Leerlinge sal beslis baat vind by die nuwe afrigtingsmetodes.
‘n Groep blokfluitspelers, met onderleiding van onderwyseres Greta Bredell, het verlede Vrydag aan ‘n lieflike musiekprogram by Margate se NG Kerk deelgeneem. Dit was ‘n heerlike ervaring waar leerlinge hulle baie goed van hul taak gekwyt het.
SNP se nuwe monitors het verlede Vrydag ‘n baie aangename opleidingsessie gehad waar leierseienskappe en probleem oplossing bespreek is. Daarna is die middag afgesluit met pretaktiwiteite.
