Mike Bolhuis en sy span het die ondersoek oorgeneem van die tiener wat in Februarie dood aangetref is nadat sy gaan stort het.
Zariskia Czövek se lewelose lyfie is op 28 Februarie deur haar ma, Venice Vosloo gekry.
Vosloo het gesê sy het nog geen antwoorde gekry wat sin maak van wat daardie aand gebeur het nie.

“Dit vreet my op. Ek het soveel vrae, ek wil net geregtigheid hê vir my ‘Babyloo’.”

Daardie aand se gebeure is diep in Vosloo se oë ingeëts.
Sy het vertel dat sy op die bed aan die slaap geraak het na die lang rit Pietersburg toe.
Zariskia het net na 20:30 gaan stort en drie ure later het Vosloo die badkamerdeur opgebreek en haar dogter se lyfie opgetel.

Daar is bespiegelinge dat Zariskia deur gas oorval is toe sy gaan stort het. Die badkamer het ’n gas geiser in.
Jacques Visser wat die ondersoek lei, het gesê hierdie gaan ’n proses wees.

“Ons het reeds met baie kenners gesels oor gasinstallasies. Ons sal almal op hoogte hou soos ons ondersoek vorder,” het Visser gesê.

Die kostes vir ondersoeke op die vlak is geweldig hoog. Vosloo is besig met verskeie fondsinsamelingsprojekte om die geld bymekaar te maak.
Sy is besig om ’n gholfdag te reël wat op 1 Augustus by Witbank Gholfbaan gaan plaasvind.

Sy reik uit na die gemeenskap om die reis saam met haar te voltooi.
As jy belangstel in die gholfdag, kan Vosloo gekontak word by 074 319 7651.

Sien die video hier: Zariskia was ’n bondeltjie energie wat vir elke oomblik geleef het

Nuus wat saak maak … Volg WITBANK NUUS op ons webtuiste, Facebook, Twitter,  Instagram of TikTok

Gesels met ons: info@witbanknews.co.za