Karakter en waardes die beste wapens teen boelies
Die belangrikste wapen teen boeliegedrag is nie fisieke krag is nie, maar goeie karaktereienskappe soos waarheid, geregtigheid, vrede, geloof en wysheid.
Boeliegedrag word nie met die vuiste oorwin nie, maar met karakter. Met dié boodskap het AfriForum se teenboeliespan Laerskool Taalfees op 28 Julie besoek om leerlinge met praktiese vaardighede toe te rus om boeliegedrag te herken en daarop te reageer, asook om ’n kultuur van respek en omgee te bevorder.
Die interaktiewe aanbieding het leerlinge gewys dat die belangrikste wapens teen boeliegedrag nie fisieke krag is nie, maar karaktereienskappe soos waarheid, geregtigheid, vrede, geloof en wysheid.
Hulle is aangemoedig om dié waardes daagliks uit te leef en te besef dat elke keuse – om iemand in te sluit of uit te sluit, op te bou of af te breek – die kultuur van ’n skool beïnvloed.
“Kinders word daagliks gekonfronteer met keuses wat hul karakter vorm. Die Bybel leer ons dat ware krag nie daarin lê om ander te oorheers nie, maar om met waarheid, moed, respek en selfbeheersing op te tree. Dit is die eienskappe wat help om boeliegedrag te voorkom en veilige skole te bou,” het Mari-Louise Erasmus, aanbieder van AfriForum se teenboelieprogram, gesê.
Volgens Erasmus is die teenboelieveldtog daarop gemik om leerlinge nie net bewus te maak van boeliegedrag nie, maar hulle ook toe te rus om die regte keuses te maak.
“Elke keer wanneer ’n leerling kies om iemand in te sluit, vir ’n maat op te staan of met respek op te tree, word die kultuur van die skool versterk. Dit is hoe karakter gebou word – een goeie keuse op ’n slag.”
AfriForum moedig skole, ouers en gemeenskappe aan om saam te werk om karakter doelbewus by kinders te ontwikkel.
AfriForum se gratis stel teenboelieplakkate is aanlyn beskikbaar.
Vir meer inligting oor AfriForum se teenboelieveldtog, besoek www.teenboelie.co.za.
LEES MEER Talle parke in eMalahleni is kort gesny danksy AfriForum se buurtspan
Jou stad, jou storie soos dit gebeur. Bly op hoogte met die jongste nuus met WITBANK NUUS,
Volg ons op website, Facebook, X, Instagram or TikTok
Epos: info@witbanknews.co.za
