Elkana Gemeenskapskerk vier Vrouedag in styl
Die dag was nie bloot 'n viering van vrouwees nie, maar bo alles van God se werk in die lewe van elke vrou.
Op 25 Julie het die Elkana Gemeenskapskerk ’n spesiale Vrouedaggeleentheid aangebied met die tema, “Sy lag vir die toekoms”.
Die boodskap was gegrond op Spreuke 31:25: “Sy is beklee met krag en waardigheid; sy lag vir die toekoms.”
Die eerste spreker, Sonja Stadler – ’n sielkundige, avonturier en sakekonsultant met meer as 30 jaar ondervinding – het haar inspirerende lewensgetuienis gedeel. Sy het ook ’n praktiese aanbieding gelewer oor die “Pilare vir ’n gesonde gees, liggaam en siel” en waardevolle riglyne gedeel vir ’n gebalanseerde en gesonde lewe.
Die dag was nie bloot ’n viering van vrouwees nie, maar bowenal van God se werk in die lewe van elke vrou. “Die vrou van Spreuke 31 leef nie uit haar eie krag nie, maar is beklee met die krag en waardigheid wat die Here aan haar skenk.
Daarom hoef sy nie die toekoms met vrees tegemoet te gaan nie; sy kan eerder met geloof, hoop en vreugde vorentoe kyk in die wete dat haar lewe veilig in God se hande is,” het pastoor Lorraine van Staden gesê.
Die boodskap het elke vrou opnuut daaraan herinner dat haar waarde nie deur omstandighede bepaal word nie, maar deur haar identiteit in Christus.
“Wanneer die Here ons Bron is, verander onsekerheid in vertroue, bekommernis in vrede en vrees in vreugde,” het Van Staden gesê.
Die tweede sessie is aangebied deur Surain Goosen en Nicorené Van Wyk, wat die vroue met ’n lagterapiessessie gelei het.
Die sessie het gefokus op die vele voordele van lag, insluitend die vermindering van stres en angs, die verbetering van gemoedstemming en energievlakke, die versterking van gemeenskap en verbondenheid, en die bevordering van algemene gesondheid en welstand.
Die vroue het die sessie terdeë geniet. Die geleentheid is afgesluit met dankbaarheid teenoor die Here vir Sy goedheid en die vaste oortuiging dat elke vrou met Sy krag beklee is om die toekoms met geloof tegemoet te gaan.
LEES MEER: Steelcrest wys hulle staal en wen Mpumalanga Middelskole-kampioenskap.
Boanerges MCC revved up support for a great cause by hosting a winter fundraising event for the local SPCA
— WitbankNews (@WitbankN) July 10, 2026
Check out the photos:https://t.co/RdqLbgJxPO pic.twitter.com/dDQrxalRCX
Jou stad, jou storie soos dit gebeur. Bly op hoogte met die jongste nuus met WITBANK NUUS,
Volg ons op website, Facebook, X, Instagram or TikTok
Epos: info@witbanknews.co.za
