Allies kokke kan lekker kook by Vinkel en Koljander-kombuis

Hoërskool Alberton hoop dat talle leerders in die toekoms ’n passie vir kosmaak in die nuwe Vinkel en Koljander-kombuis sal vind.

August 10, 2018

Monique van Wyk 1 minute read

GASTE: Voor: Deon Nolte (beheerliggaam), Rouxnette Olwagen (onderwyseres), Cindy Swart (onderwyseres), André Olckers (beheerliggaam). Agter: Dr Jorrie Jordaan (skoolhoof), Gerhard van Schoor (beheerliggaam), Henry van der Hoven (beheerliggaam), Corné van Staden (beheerliggaam) en Victor Lemmer (beheerliggaam).

DIE openingsaand van die nuwe Vinkel en Koljander kombuis by Hoërskool Alberton, op Dinsdag, 7 Augustus, was gesellig en smaaklik.

Verskeie onderwysers, onderwyseresse en lede van die skool se beheerliggaam was uitgenooi om die nuwe kombuis in te wy. Die kombuis, handig vir die skool se verbruikerstudies-vak, het vele kombuisware en –toerusting om leerders die kans te gee om hul kulinêre kreatiwiteit te ontdek en te verken.

AMPTELIKE OPENING: Gerhard van Schoor sny die lint as simbool van die kombuis se amptelike opening.

Leerders van die verbruikerstudies-vak het na skool op die middag van die opening ’n paar heerlike disse voorberei wat die aand vir gaste van die byeenkoms voorgesit is. Met ’n bietjie hulp van die onderwysers, het hulle alles self uit rou bestanddele gebak en gekook.

HEERLIKE KOS: Die leerders het hulself oortref en dit was beslis ’n smaaklike ete waaraan almal kon weglê.

Hul fynproewer-disse het onder andere frikkadelrolletjies (hamburgers), aartappelskyfies en alkoholvrye garnaalkelkies ingesluit. Die gaste het heerlik gesmul.

Hoërskool Alberton hoop dat talle leerders in die toekoms ’n passie vir kosmaak sal vind in die nuwe Vinkel en Koljander kombuis.