Die jong skopbokser van Fochville wat reeds vroeër vanjaar ‘n tweede keer met ‘n wêreldtitel in dié sportsoort weggestap het, is op pad na nog ‘n groot byeenkoms.

Die negejarige Liam van Wyk gaan van 21 tot 27 Junie aan die Afrika skopbokskampioenskap in Yaoundé in die Sentraal-Afrika-land, Kameroen deelneem.

Dié byeenkoms word deur WAKO (World Association of Kickboxing Organisations) aangebied om talent vir toekomstige internasionale kompetisies te identifiseer.

Liam, ‘n leerder van Laerskool Fochville wat deel is van die United Martial Arts International skopboksklub in Benoni, het in April tydens die wêreldkampioenskap in Bangkok, Thailand as wenner van die afdeling vir vegters van 10 tot 12 jaar weggestap.

Dit was die tweede jaar wat hy dié prestasies bereik het.

“Ons is ongelooflik trots op Liam en wens hom alle sukses toe terwyl hy die Suid-Afrikaanse vlag hoog laat wapper,” sê Liam se ma, Gwen.