Leerders, skool terrein met gebede omvou
Almal het in ‘n kring vergader en het die geleentheid gekry om vir die skool te bid.
Lede van die gemeenskap het by Hoërskool JW Luckhoff vergader om ‘n bidgroep te vorm en vir die leerders van JW Luckhoff se geestelike genesing en welstand te bid.
Riëtte Höll (onderwyseres van Hoërskool JW Luckhoff) het op 11 Junie leraars van verskillende kerke genooi om deel te neem aan die bidgroep.
“Die Here het dit op my hart gedruk dat daar ‘n bidgroep gevorm moet word om vir die leerders te bid,” het sy gesê.
Leraars wat Höll genooi het was Thabiso Kubheka (Acts Family Church), Werner Lombaard (Heidelberg AGS Kairos Kerk) en Mariza Cronje (onlangs gekwalifiseerde pastoor en vrywillige berader vir Hoërskool JW Luckhoff). Daar was 15 mense in totaal wat deelgeneem het, insluitend Jaco Kritzinger van Lesedi Care Centre (LCC) en Kapt Lena Ras van Heidelberg SAPD.
Almal het in ‘n kring vergader en het die geleentheid gekry om vir die skool te bid.
Höll het die bidgroep in vier groepe gedeel wat na die verskillende hoeke van die skoolterrein beweeg het.
“Die plan is om ‘n ‘net’ van gebede wat die skool sal beskerm, te vorm,” het sy verduidelik.
Elke groep het ‘n paar minute geneem om die skool vanaf die verskillende punte te seën en het weer na die tyd by die beginpunt vergader. Daar het hulle weer ‘n kring gevorm en vir die leerders van die skool se welstand gebid.
Die bidgroep sal in Augustus weer by Hoërskool JW Luckhoff vergader. Persone wat belangstel om by die bidgroep aan te sluit, kan vir Riëtte Höll by 082 325 2419 skakel.
| Volg ons op: | ||
 |
 |
 |
 |
