Harte klop warm vir skenkings
Die kinders was ingenome met die geskenke en kon nie wag om die Disney geïnspireerde klere aan te pas nie. Daarby het elkeen ook ‘n sagte kombers ontvang.
Lesedi Community Centre sien nie net om na hawelose mense by hulle skuiling in Loveday Straat, Rensburg nie, hulle het ook harte van goud vir weerlose bejaardes en weeskinders.
LCC verskaf daagliks kos aan vele straatmense in Heidelberg se middedorp en hulle is afhanklik van skenkings van kos, komberse en warm klere wat hulle aan mense in nood oorhandig. Een van dié skenkings wat van ‘n anonieme skenker ontvang is, was kindermussies, kouse en handskoene wat aan die 11 inwonertjies van die Galaxy Children’s Village (‘n kinderhuis) op 21 Junie oorhandig is.
Die kinders was ingenome met die geskenke en kon nie wag om die Disney geïnspireerde klere aan te pas nie. Daarby het elkeen ook ‘n sagte kombers ontvang.
Die bejaardes van Suikerbosoord Dienssentrum vir Bejaardes is ook nie vergeet nie en Jaco Kritzinger (bestuurder van LCC) het op 25 Junie komberse aan inwoners oorhandig.
Indien jy LCC met skenkings of borge wil bystaan, skakel Jaco by 072 575 0081.
