Oud-Springbok was ‘n trotse Volkie
Heidelberg rou saam land oor Ockie Oosthuizen.
Ockie Oosthuizen was ‘n gewilde, vriendelike kind wat in sport uitgeblink het. Só onthou Mnr Ed de la Harpe (voormalige onderwyser van Hoër Volkskool) die oud-Springbokstut wat op 3 Desember in die ouderdom van 64 jaar sy stryd teen kolonkanker verloor het.
Ockie het in 1972 aan Hoër Volkskool matrikuleer en was die kaptein van die rugby eerstespan. Hy was in dieselfde jaar ook kaptein van die Oos-Transvaalse hoërskole rugbyspan.
Mnr De la Harpe sê die destydse skoolhoof Mnr Charl Möller se vrou Erica was veral lief vir Ockie en hy was haar ‘witbroodjie’ genoem. Hy was geliefd onder sy maats sowel as onderwysers. Hy het nie net in rugby uitgeblink nie, maar was ook ‘n gerekende atleet.
“Ockie was ‘n innemende mens wat nooit sy skool vergeet het nie. Hy het ons in 2016 besoek en van sy eie wyn wat hy op sy plaas buite Stellenbosch verbou het, saamgebring. Ek was beïndruk. Dit was heerlike wyn,” het Mnr De La Harpe onthou.
Tydens dié besoek het Corrie Human (voormalige voorsitter van Hoër Volkskool se beheerliggaam) ‘n oorkonde aan Ockie oorhandig. Hy het die skool vir ‘n heerlike kuier en gasvryheid bedank. Hy het gesê dat dit ‘n eer was om sy alma mater te kon besoek.
Ockie het nege toetse vir die Springbokke gespeel en het ook vir Wes- en Noord-Transvaal uitgedraf. Hy laat sy vrou Susan, drie kinders en twee kleinkinders agter.
