Inwoners gasvry onthaal

Die SAVF-Huis se jaarlikse Kersonthaal wat die jaar se hoogtepunt vir die inwoners is, het verlede Donderdag plaasgevind.

Saam met ’n aantal eregaste het hulle in die eetsaal wat vir die geleentheid paslik versier was, by die keurig gedekte tafels aangesit.

Voordat behoorlik aan die smaaklike koue ete weggelê is, het die tehuis se voorsitter, me. Hannie Smith, almal verwelkom en die tafelgebed gedoen.

Aan die einde van die verrigtinge wat Deirdré de Bruyn en haar sewejarige broertjie DJ met sang en musiek opgehelder het, het almal “oorversadig” huiswaarts gekeer, elkeen met ’n Kerskoek wat ’n anonieme weldoener geskenk het. (CK)