ERMELO – ‘n Inwoner van Groblerstraat is op 21 Oktober omstreeks 03:00 in sy huis in ‘n woonstelkompleks aangeval.

Die twee aanvallers het die hek na die kompleks van die spoor afgetel en die motorhuisdeur oopgebreek, en toegang tot die huis verkry.

Een het die man op sy bed vasgedruk, ‘n mes teen sy keel gedruk en kontant en vuurwapens geëis.

Die tweede rower het die huis deursoek en geplunder.

Volgens kapt. Carla Prinsloo, die polisiewoordvoerder, het die verdagtes ‘n klompie items gebuit en te voet gevlug.

Die inwoners se verhuurder kon nie die polisie in die hande kry nie en het Acsu Sekuriteit se beheerkamer geskakel, wat reaksiepersoneel na die toneel ontbied het.

Die man is nie tydens die rooftog beseer nie.

Die Ermelo-polisie ondersoek ‘n klag van huisroof.