ERMELO – Sowat ‘n maand gelede het Hoëvelder ‘n verslag gedoen oor die probleme by die plaaslike lisensiëringskantore.

Stelsels wat van lyn af is, eindelose toue en bewerings van korrupsie – soos toenemende kommer dat sekere werknemers selektief, en moontlik teen betaling, mense en motorhandellaars help, terwyl ander ure lank moet wag – is iets wat inwoners daagliks in die gesig staar.

Verder sluit inwoners se klagtes die volgende in:

• Gebrek aan skadu vir mense wat ure in rye moet wag
• Geen duidelike kommunikasie of visuele aanduidings wanneer stelsels van lyn af is of watter tou waarvoor is nie
• Onsekerheid oor hoeveel mense per dag gehelp sal word, wat veroorsaak dat mense reeds voor dagbreek opdaag
• Personeel wat ongeskik of afwysend is teenoor kliënte
• Geen meganisme vir klagtes of terugvoer op die perseel self nie
• Aanhoudende bewerings dat omkoopgeld betaal word om voorkeurbehandeling te verseker, veral aan motorhandelaars
• ‘n Algemene gevoel dat sekere kliënte doelbewus voorgetrek word, ten koste van ander wat lank wag

Op 13 Maart moes inwoners onverrigter sake huis toe terugkeer nadat die kantore sonder elektrisiteit was weens wanbetaling – ’n verdere aanduiding van moontlike administratiewe wanbestuur.

Die plaaslike lisensiëringskantore val al ’n geruime tyd nie meer onder die Msukaligwa Plaaslike Owerheid nie, en word deur die Department van Gemeenskapsveiligheid, Sekuriteit en Skakeling bestuur.

In reaksie op navrae het Moeti Mmusi, die woordvoerder van dié departement, antwoorde namens die LUR van die departement in Mpumalanga, Jackie Macie, verskaf.

Volgens hierdie antwoorde is daar onder andere onderneem om die kantore persoonlik te besoek en ondersoek in te stel na die bewerings van korrupsie, die feit dat daar geen publieke ablusiegeriewe is nie, ontsettende lang wagperiodes en die algemene swak dienslewering.

Daardie besoek het egter nie gerealiseer nie.

Inteendeel, daar is kort voor die koerant se ter perse gaan, versoek dat die verwysing na Macie se beplande besoek liefs verwyder word.

LEES OOK: Ermeloërs raadop oor dienste by lisensiëringkantore

Dit laat die vraag ontstaan of daar ooit ‘n werklike voorneme was om die kantore te besoek, óf of die aanvanklike kommentaar bloot bedoel was om verontwaardigde partye te paai.

Teen druktyd was daar nog geen reaksie van Mmusi hieroor nie.

Lees die volledige berig in vandeesweek se Hoëvelder.