Rioolprobleme in Ermelo duur onverpoosd voort
Die inwoners het hul misnoeë oor die munisipaliteit se hantering van rioolprobleme op 'n munisipale Telegram-groep te kenne gegee.
ERMELO – Die gemeenskap gaan reeds vir ‘n geruime tyd onder die stank en ernstige besoedeling weens rioolprobleme gebuk, en daar is min aanduiding dat daar gou enige verligting gaan kom.
Hoëvelder het deur die dorp gery en verskeie gebiede besoek waar inwoners aangedui het dat mangate oorloop, insluitend Roberts-, Van Zyl-, John Vorster-, De Bruin- en Generaal Bothastraat.
Die inwoners het hul misnoeë oor die munisipaliteit se hantering van rioolprobleme op ‘n munisipale Telegram-groep te kenne gegee.
Heelwat klagtes word daarop aangemeld, maar ten spyte van verskeie rolspelers op die groep se beste pogings om die kwessies aan die munisipaliteit oor te dra, bly die dorp se infrastruktuur ‘n bron van kommer.
Ten spyte van Hoëvelder se pogings om antwoorde van die munisipale woordvoerder, Mandla Zwane, te verkry, is daar tot op 8 Januarie nog geen reaksie ontvang nie.
Die inwoners se uitdagings en probleme met riool duur dus voort.
